XVII гасырда татар теле бүгенге инглиз теле, урта гасырлардагы латин шикелле халыкара кулланылышта булган

XVII гасырда Мәскәүдәге Каменный илчелек йорты

XVII гасырда татар теле бүгенге инглиз теле, урта гасырларда Европада латин шикелле халыкара кулланылышта булган. Бу турыда журналистлар белән очрашуда ТР ФАнең Татар энциклопедиясе һәм төбәкне өйрәнү институты директоры Искәндәр Гыйләҗев сөйләде.

Аның әйтүенчә, XVII гасырда татар теле күпләгән көнчыгыш илләре белән аралашу өчен Мәскәүнең илчелек боерыкларында бик еш кулланылган.

«Үз вакытында татар теле халыкара аралашу теле буларак кулланылган. Ул рус дәүләтенең Көнчыгыш илләре белән аралашуында дипломатик мөнәсәбәтләр теле булып торган. Татар теле илчелек боерыкларында, рус патшаларының рәсми аралашу кәгазьләрендә, мәсәлән, Алексей Михайловичның Һиндстан, Иран, Урта Азия һәм башка күп дәүләтләр белән рәсми язышуларында бик еш кулланылган. Татар теле ул заманнарда бүгенге инглиз, ә урта гасырларда Европадагы латин дәрәҗәсендә торган. Моның шулай икәнен күпләр белми, ә чынлыкта ул шулай» – диде Гыйләҗев.

© Мәкаләгә (яңалыклар) бөтен хокуклар татар интернет-журналы «Кара Аккош»ка карый (karaakkosh.com). Язманы тулысынча яки өлешчә күчереп алганда татар-интернет журналы «Кара Аккош»ка (karaakkosh.com) туры сылтама кую мәҗбүри.