|
Кичә Казанда «Мир» кинотеатрында «Айсылу» дигән кыска метражлы татар нәфис фильмының премьерасы булды, анда талантлы авыл кызының катлаулы язмышы күрсәтелә.
Фильм көтелмәгән шау-шу китереп чыгарды, 28 минутлык кыска метражлы фильмны карарга теләүчеләрнең чираты урамга кадәр сузылган иде; шул сәбәпле, фильмны карауны оештыручылар тамашачыларны икегә бүлделәр һәм кабатлап күрсәтергә булдылар.
Фильм берәүне дә битараф калдырмады, мәсәлән беренче булып караган тамашачылар татар халык җыры «Ак калфак» яңгыраганда төп героиня Айсылуга кушылып бөтен зал белән җырлап утырдылар. Сеанс тәмамланганда исә күп кеше күргәннәреннән соклануларын яшермәде, кайберләренең күзләре дә яшьләнгән иде.
Кичә тәмамланганда сәхнәгә фильмны төшерүчеләр һәм артистлар күтәрелде, алар үзләренең тәэсирләре белән уртаклаштылар һәм фильмның тагын булачак дәвамы турындагы планнары белән уртаклаштылар.
Кыска белешмә:
«Айсылу» фильмы яшь режиссер Рөстәм Рәшитов тарафыннан «Татаркино» заказы буенча 2014 елда төшерелә; картинада рольләрне Г. Камал исемендәге Татар дәүләт академия театры һәм Г. Кариев исемендәге Казан Татар дәүләт яшь тамашачылар театры, К. Тинчурин театры артистлары башкара, баш рольне исә яшь йолдыз - Гөлназ Галимуллина уйнады.
Кыска метражлы «Айсылу» фильмы үзенә күрә 2015 елда төшереләчәк фильмнарның прологы булып тора, чөнки аны төшерүчеләр тагын 2-3 тулы метражлы фильм һәм 12 күренештән торган сериал төшерергә җыеналар.
12.02.2015
© Мәкаләгә (яңалыклар) бөтен хокуклар татар интернет-журналы «Кара Аккош»ка карый (karaakkosh.com). Язманы тулысынча яки өлешчә күчереп алганда татар-интернет журналы «Кара Аккош»ка (karaakkosh.com) туры сылтама кую мәҗбүри.
|
