|
Бүген Татарстан Республикасының күп кенә зур мәчетләрендә ТР мөселманнары Диния нәзарәте оештырган - «Мин Пәйгамбәрне яратам» дигән масштаблы акция булып үтте.
Чарада катнашучы һәркем Аллаһ илчесенә булган хөрмәтен һәм яратуын махсус значок ярдәмендә белдерә алды, анда «Мин Пәйгамбәрне яратам» дигән өч телдә (татар, гарәп, рус) язылган язу бар иде.
Моннан тыш мәчетләрдә Пәйгамбәрнең тормышы һәм эшчәнлеге турында вәгазьләр укылды. Гыйбадәт кылучылар каршында республиканың танылган дин әһелләре өндәмә белән чыгышлар ясадылар.
Мондый чара үткәрелүгә Мөхәммәт Пәйгамбәргә ясалган карикатура сәбәпче булды; исегезгә төшерәбез, шушы елның 14нче гыйнварында танылган француз атналык сатирик журналы «Charlie Hebdo»да җәнҗал чыгаруга сәбәпче булган рәсем басылган иде.
Моны белү кызык:
Пәйгамбәргә теләктәшлек белдергән мондый чаралар дөньяның бик күп илләрендә үткәрелде инде, шул исәптән РФ кайбер регионнарында да. Мәсәлән, Чечен Республикасында, Россия эчке эшләр министрлыгы мәгълүматлары буенча, бу чарада миллионга якын кеше җыйналган.
30.01.2015
© Мәкаләгә (яңалыклар) бөтен хокуклар татар интернет-журналы «Кара Аккош»ка карый (karaakkosh.com). Язманы тулысынча яки өлешчә күчереп алганда татар-интернет журналы «Кара Аккош»ка (karaakkosh.com) туры сылтама кую мәҗбүри.
|
