«Мисс Татарстан» сайтының скриншоты
Кичә Казанда «Пирамида» мәдәни-күңел ачу комплексында «Мисс Татарстан-2015» матурлык конкурсының финалы булып узды, анда республиканың 15 яшьтән 22 яшькә кадәрге 30 иң матур кызы катнашты.
Конкурс нәтиҗәләре буенча 18 яшьлек Виктория Романова җиңеп чыкты. Беренче вице-мисс булып 19 яшьлек Алисә Маненок, ә икенче вице-мисс булып Яр Чаллының 18 яшьлек кызы Гөлчәчәк Акбитова калды.
Моннан тыш «Мисс очарование» билгеләнде. Ул - Ләйлә Шәрипова. «Мисс Ривьриана»га Камилә Харисова һәм «Мисс фото»га Екатерена Тебекина лаек булдылар.
Шулай ук, традиция буенча «Мисс Казан» сайланды. Бу исемне башкаланың 19 яшьлек гүзәле Камилла Җәләлиева алды.
Моны белү кызык:
Беренче тапкыр «Мисс Татарстан» дигән матурлык конкурсы инде күптән, 1998нче елда Муса Җәлил исемендәге Татар академия дәүләт опера һәм балет театрында үткәрелгән иде. Ул вакытта беренче җиңүче Яр Чаллы шәһәреннән Ләйлә Кәшипова булды, бер елдан соң ул «Мисс Россия-1999» конкурсының финалындагы беренче унлыкка керде.
27.01.2015
© Мәкаләгә (яңалыклар) бөтен хокуклар татар интернет-журналы «Кара Аккош»ка карый (karaakkosh.com). Язманы тулысынча яки өлешчә күчереп алганда татар-интернет журналы «Кара Аккош»ка (karaakkosh.com) туры сылтама кую мәҗбүри.
|
