Рөстәм Миңнеханов
2014 елның 14 ноябрендә Дәүләт думасына Татарстан башлыгы 2016 елның 1 гыйнварына кадәр генә республика президенты дип атала ала дигән закон проекты кертелде.
Исегезгә төшерәбез, республика җитәкчеләрен «президент» дип атауны тыю турындагы федераль закон Дәүләт думасы тарафыннан 2010 елның декабрендә кабул ителгән иде. Законны гамәлгә ашыру өчен 5 ел вакыт бирелде. Шушы вакыт эчендә, Татарстаннан кала, бөтен милли республикалар Конституцион үзгәрешләр кичерделәр. Татарстан исә бу яңалык кертү белән кискен рәвештә килешми, мәсәлән, Дәүләт Советы спикеры Фәрид Мухаметшин инде берничә тапкыр бу «аңлашылмаган» инициатива Россия Конституциясенә каршы килә һәм әле тагын «федераль үзәк белән сөйләшүләр предметы» булыр дип белдерде.
Тагын шунысын да билгеләп үтик, Татарстан Республикасында президент титулын саклап калу өчен күп санлы гражданнар, иҗтимагый оешмалар, сәясәтчеләр, спортсменнар, мәдәният һәм фән хезмәткәрләре чыгыш ясый.
17.11.2014
© Мәкаләгә (яңалыклар) бөтен хокуклар татар интернет-журналы «Кара Аккош»ка карый (karaakkosh.com). Язманы тулысынча яки өлешчә күчереп алганда татар-интернет журналы «Кара Аккош»ка (karaakkosh.com) туры сылтама кую мәҗбүри.
|
