Бүген, төн уртасында, Магдебург дигән немец шәһәрендә Үзбәкстан боксеры Руслан Чагаев итальян Франческо Пьянетины нокаутка җибәреп, иң авыр үлчәүдә WBA чемпионы титулын яклауны башлап җибәрде.
Ярышның дәрәҗәсенә, һәм ике боксчының көчләре тигез булуга карамастан, елның иң көтеп алынган көрәше, башланмас борын төгәлләнеп тә куйды. Татар Руслан Чагаев көндәшенең аз гына каушап калуыннан файдаланып, беренче раундның уртасында ук бәхетсез итальянны нокдаунга җибәрде, ә раунд ахырында бөтенләй нокаутка озатты, шуның белән чемпион билбавын саклау юлында беренче адымын ясады (аны саклап калу өчен WBA кагыйдәләре буенча, рәттән ике яклау булуы кирәк).
«Кара Аккош» интернет-журналының кыска белешмәсе:
Чагаев Руслан Шамил улы-авыр үлчәүдәге боксчы, 1978 елда Андижан (ҮССР) шәһәрендә туган. Һәвәскәрләр арасында ике тапкыр дөнья чемпионы һәм ике тапкыр Азия чемпионы.
2001 елда Белфастагы бик шәп үткәрелгән дөнья чемпионатыннан соң, ул «Ак Тайсон» кушаматы ала.
Үзенең һөнәри үсешендә 34 уен үткәрә, шуның 31ендә җиңә (21е нокаут белән), шулай ук иң авыр үлчәүдә WBA версиясе буенча, ике тапкыр дөнья чемпионы була (2007-2009 һәм 2014 еллар).
12.07.2015
© Мәкаләгә (яңалыклар) бөтен хокуклар татар интернет-журналы «Кара Аккош»ка карый (karaakkosh.com). Язманы тулысынча яки өлешчә күчереп алганда татар-интернет журналы «Кара Аккош»ка (karaakkosh.com) туры сылтама кую мәҗбүри.
|
