|
Татарстан Республикасы татар телен белү дәрәҗәсе буенча халыкара сертификацияләү системасы кертергә планлаштыра, ул IELTS, TestDaf һәм Dele кебек халыкара тел имтиханнары шикелле булачак.
2015нче елдан башлап, әлеге тестларны тугызынчы сыйныфны тәмамлаучы барлык укучылар тапшырачак дип, уйланыла; алар аттестат белән бергә татар телен белү дәрәҗәсе буенча сертификат та алачаклар... Ә тагын берничә елдан сертификат алу Татарстандагы югары уку йорты студентларына да кагылачак, аерым алганда, медицина өлкәсендәгеләргә. Булачак врачлар эчке әгъзаларның һәм кеше тәненең аерым өлешләренең татарча ничек әйтелүен белергә тиешләр, киләчәктә бу аларга татар телендә сөйләшүче пациентларның зарларын төгәлрәк аңларга ярдәм итәчәк.
Шулай ук Татарстан республикасы Мәгариф һәм фән министрлыгында киләчәктә татар телен белү дәрәҗәсе буенча бирелә торган бу сертификатлар эш бирүчеләр тарафыннан да (работодатель) исәпкә алыныр дип өметләнәләр.
22.10.2014
© Мәкаләгә (яңалыклар) бөтен хокуклар татар интернет-журналы «Кара Аккош»ка карый (karaakkosh.com). Язманы тулысынча яки өлешчә күчереп алганда татар-интернет журналы «Кара Аккош»ка (karaakkosh.com) туры сылтама кую мәҗбүри.
|
