2015 елның 1 сентябреннән башлап Казан (Идел буе) федераль университеты (КФУ) студентлары төгәл фәннәрне (математика, информатика, мәгълүмати технологияләр) татар телендә өйрәнүдән мәһрүм ителәчәкләр.
Мондый хәл РФ Мәгариф министрлыгының бу юнәлештәге финансларны шактый кыскартуы аркасында килеп чыкты.
Җәмәгатьчелек һәм экспертлар фикеренчә, мондый тәҗрибә котылгысыз рәвештә инде якын киләчәктә татар теленең башка белем учакларында да сүнүенә китерәчәк, аерым алганда милли мәктәпләрдә укучылар татар телендә укуның өметле булмаячагын күреп, аны тирәнтен өйрәнүдән баш тартачаклар. Әмма ләкин бу экономияләүнең җимешләре тагын берничә елдан өлгерәчәк, чөнки мәктәпләрдә татар телендә белем бирүче укытучылар калмаячак.
Килеп туган мондый хәлдә КФУда төгәл фәннәрне татар телендә өйрәнүне саклап калу өчен Татарстан Республикасы хөкүмәтенә өмет багларга кала, ул исә рәсми булмаган хәбәрләр буенча, бу мәсьәләне өйрәнү белән шөгыльләнә.
07.07.2015
© Мәкаләгә (яңалыклар) бөтен хокуклар татар интернет-журналы «Кара Аккош»ка карый (karaakkosh.com). Язманы тулысынча яки өлешчә күчереп алганда татар-интернет журналы «Кара Аккош»ка (karaakkosh.com) туры сылтама кую мәҗбүри.
|
